Nangin kaladlawan ang Defense Minister sang Pakistan nga si Khawaja Asif matapos mag-ribbon cutting sa peke nga restaurant sa Sialkot, Punjab.
Bugal nga ginpangunahan sang opisyal ang amo nga ribbon-cutting ceremony sang isa ka pizza restaurant sa nasambit nga lugar kun sa diin makit-an pa nga nagayuhom ini kag nakigshake hands pa sa mga tag-iya sa atubang sang camera.
Apang, pila lang ka oras ang nagligad matapos ang ribbon-cutting ceremony, nagpagwa sang pahayag ang tagdumalahan sang pizza restaurant nga wala sila nagbukas sang branch sa Sialkot.
Suno sa ila, isa ka “unauthorized outlet” ang amo nga branch nga ilegal nga nagagamit sang ila ngalan, logo, kag branding.
Gilayon nga nakabaton sang nagkalain-lain nga reaction sa social media ang amo nga insidente bangud ang isa ka Defense Minister nga dapat nga maalam kag mabinantayon ang nangin biktima sang peke nga negosyo.
Sa subong, ang popular nga pizza restaurant chain ang nag-file sang reklamo agud nga siraduhon ang peke nga restaurant kag bawion ang trademark, samtang si Asif naman ang wala sa gihapon nagpagwa sang statement angot sa insidente.
