ROXAS CITY – Padayon nga ginabulong sa Roxas Memorial Provincial Hospital (RMPH) ang delivery rider matapos nag-angkon sang pilas sa magkatuhay nga parte sang lawas dala sang pagkabunggo sang ginasakyan nga motorsiklo sa naga-park nga truck nga may karga nga tubo, ginabulubanta 5:58 kahapon, Pebrero 22 sa Barangay Amaga, Sigma, Capiz.
Ginkilala ang biktima nga si alyas ‘Jessie’, 39-anyos residente sang Barangay Caidquid, Mambusao Capiz.
Samtang ang driver sang truck ang ginkilala nga si alyas ‘Danny’ 55-anyos residente sang Barangay Tubod, Passi City.
Sandig sa imbestigasyon sang Sigma Municipal Police Station, papuli na kuntani si alyas ‘Jessie’ sang aksidente ini nga bumunggo sa nalikod nga parte sang naka-park nga truck kag nagresulta sang iya pagkatumba kag pilas sa lawas.
Nagresponde naman ang Emergency Response Team sang Sigma kag gindala sa ospital si ‘Jessie’.
Ginkustodiya naman sang kapulisan si alyas ‘Danny’ para sa nagakaigo nga disposisyon.
