ROXAS CITY – Gintupok sang kalayo ang isa ka delivery van nga may karga nga kurodo kag gasolina sa national highway sa Brgy. Pob Ilawod banwa sang Panitan.
Sa pagpangusisa sang Bombo Radyo kay John Harold Salas isa sa mga nakasaksi sang sunog, ginpahayag sini nga nagpangayo sa ila sang tubig ang driver sang salakyan kag pahinante sini kag nakita nila nga may gamay nga kalayo sa idalom sang salakyan nga hinali nalang nagdaba-daba.
Dugang pa sini nga nagbulig pa sila sang sabya sang tubig agud mapalong apang mas labi nga naga-ibwal ang kalayo.
Suno pa diri, nga sang nagdaba-daba na ang salakyan madasig nga nagpalagyo ang driver kaupod ang pahinante nga ginapahayag sini nga lunsay mga bataon pa.
Madasig naman sila nga nagpanawag sang responde sa Panitan Bureau of Fire Protection apang bangud indi masarangan nga ma fire-out ang kalayo, nagpangayo naman ini sang dugang nga responde kun sa diin ginpadulungan sang Dao, Pontevedra, kag Roxas City BFP fire truck agud buliganan nga mapalong ang kalayo.
Mahibaluan nga gin-off sang capelco ang linya sang kuryente sa nasambit nga lugar bangud tuman na ka delikado.
Sa pagpakig-angot naman sang Bombo Radyo kay SFO3 Ramel Arquisola, Municipal Fire Marshall sang BFP-Panitan, ginpahayag sini nga posible nagikan ang nasambit nga salakyan sa isa ka gasoline station kag nagbakal sang ginalon nga gasolina kag kurodo agud ibaligya sang tiningi-tingi.
Ginapatihan man sini nga ginkarga ini sa isa ka closed van agud indi makit-an bangud mahibaluan nga hugot ini nga ginabawal.
Sa karun, padayon pa ang imbestigasyon sang katapo sang BFP sa nasambit nga insidente kag ginapangita pa ang driver sang amu nga salakyan.
