Nagapangita sang mga volunteers ang Department of Environment and Natural Resources–Provincial Environment and Natural Resources Office (DENR-PENRO) Capiz para sa hiwaton nga International Coastal Cleanup 2026 sa Sabado, Setyembre 19.
Ang aktibidad may tema nga “Clean Seas for Resilient Communities”, sa diin katuyoan sini nga magtipon ang mga komunidad, ahensya sang gobyerno, local government, eskwelahan, organisasyon kag iban pa nga mga partner para sa paglimpyo sang mga baybayon kag pagproteher sang kadagatan.
Suno sa DENR-PENRO Capiz, importante ang coastal kag marine ecosystems bangud nagahatag ini sang pagkaon, palangabuhian kag proteksyon sa mga komunidad.
Pinaagi sa pagpugong sang basura nga maglab-ot sa dagat kag pagpabilin sang kalimpyo sang baybayon, makabulig ang mga residente sa pagpalig-on sang komunidad batuk sa mga epekto sang climate change.
Ginpahayag man nga ang tagsa ka basura nga makolekta kag tagsa ka boluntaryo nga mag-upod sa aktibidad may daku nga kontribusyon sa pagpanubo sang basura sa kadagatan kag pag-atipan sang coastal resources.
Ang coastal cleanup magasugod alas 7:00 sang aga sa Setyembre 19, 2026, sa tatlo ka lugar sa Capiz.
Lakip diri ang Barangay Culasi sa Roxas City, Barangay Binaobawan sa Pilar, kag Barangay Balaring sa Ivisan.
Gin-imbitar ang tanan nga interesado nga mag-upod kag mangin kabahin sang mga ginatawag nga ocean champions sa sini nga aktibidad.
Ang mga luyag magpartisipar mahimo magparehistro paagi sa QR code nga yara sa official nga poster sang aktibidad.
Pinaagi sa pagtiniripon kag pagbinuligay, handum sang DENR-PENRO Capiz nga mapabilin nga matinlo ang aton mga baybayon kag kadagatan kag mapalig-on ang mga komunidad para sa mas matinlo kag mas malig-on nga palaabuton.
