Ginpasalig sang Department of Agriculture (DA) kag Food Terminal Inc (FTI) nga may bastante nga supply ang gobyerno para sa pagpadayon sang programa sang Benteng Bigas Meron na (BBM).
Suno kay Agriculture Secretary Francisco Tiu Laurel Jr., ang National Food Authority (NFA) ang padayon nga naga-replenish sang ila stocks agud masiguro ang padayon nga pagbaligya sa Kadiwa Stores, nga bukas na subong sa bug-os nga pungsod.
Suno sa iya, nahangpan sang iya opisina nga ang nagapadayon nga tensyon sa Middle East mahimo nga makatuga sang stocking anxiety, ilabi na sa mga vulnerable sector.
Dugang pa nga ginpasalig ni Tiu Laurel nga may bastante nga buffer stock ang pungsod bangud sang maayo nga patubas subong nga tuig.
Ginsiling man sini nga indi dapat mahadlok ang publiko ilabi na ang mga benepisyaryo sang amo nga programa, padayon nga matigayon ang distribusyon sang bugas sa idalum sini basta narehistro ini sa Benteng Bigas Regsitry System.
Samtang, agud malikawan ang hoarding sang bugas nga ginabaligya sa idalum sang programa, hugot nga ginapatuman sang departamento ang pagbakal sang tubtob 10 ka kilo nga bugas kada adlaw kada benepisyaryo.
