ROXAS CITY CAPIZ – Nagpahanumdum ang Department of Education (DepEd) Capiz sa mga pamunuan sang eskwelahan nga mangin praktikal kag simple lamang sa pagselebrar sang mga Christmas Party subong nga holiday season apang mabinungahon kag makahulugan.
Sa interview sang Bombo Radyo sa Public Information Officer sang Capiz Division nga si Yzarda Claudette Ballera, ginpahayag sini nga kinahanglan indi magresulta ang amu nga selebrasyon sang dako nga galastuon sa mga estudyante ilabi na sa mga ginikanan.
Suno kay Ballera, indi mahimo nga piliton sang mga manunudlo ang estudyante nga maghatag sang contribution ilabi na kung dako ang balor magluwas na lamang kung ini nagpasugot ukon nag-ugyon.
Pananglitan nga may mga ginikanan nga magpalab-ot sang ila reklamo kinahanglan nga magpaidalum ini sang intsakto nga proseso kung sa diin una mahibaluan sang pamunuan sang eskwelahan.
Mahibaluan nga natalana sa Disyembre 19 ukon 20 magasugod ang mga Christmas party sa tagsa ka mga buluthuan kag sa Disyembre 21 magasugod ang Christmas break.
Panugyan sang tagpamaba nga indi kinahanglan nga mangin magarbo ang selebrasyon bangud ang tinutuyo lamang sini nga mangin masadya ang mga kabataan.
