Preparado na para sa closing sang school year 2024-2025 kag opening sang school year 2025-2026 ang Department of Education-Capiz.
Suno kay Ms. Yzarda Claudette Ballera, Division Information Officer sang DepEd Capiz, ginpahayag nga pormal na nga magasara ang school year 2024-2025 sa Abril 15 sa sini nga tuig sandig sa ila sini nga school calendar.
Pag-abot naman sa mga school documents nga kinahanglan nga mai-sumiter sang mga manunudlo, nakatalana subong nga semana ang deadline agud nga indi na kinahanglan pa nga maghimo sang amu nga mga school related documents ang mga ini sa tion sang summer break.
Samtang, may yara naman sang pagapatigayunon nga aktibidad ang departamento may kaangtanan sa summer class ukon ang National Learning Camp nga natalana sa Mayo 19 tubtob Hunyo 6 sa sini nga tuig nga kasunod sang mandatory vacation sang mga estudyante apang sa probinsya sang Capiz, wala pa maisapinal ang listahan sang numero sang mga estudyante nga magapa-idalum sa National Learning Camp.
Pahayag pa sini nga, sandig sa DepEd Order No. 009 series of 2025 ukon ang Amendment to DepEd Order No. 009, series of 2024 (Implementing Guidelines on the School Calendar and Activities for the School Year 2024–2025) ang mga manunudlo ang may yara sang 30 days vacation nga nagasugod sa Abril 16 tubtob Hunyo 1, 2025, nga gin-implementar pamaagi sa flexible arrangements nga kun sa diin indi pwede nga maisturbo ang mga ini may kaangtanan sa school related activities pwera nalang kun magpasugot ang mga ini ukon magboluntaryo.
Samtang, pag-abot naman sa adlaw sang Recognition Rites, Moving Up Programs lag Graduation Days hugot nga ginadumilian sang Department of Education ang mga politiko nga mangin guest speaker sandig sa DepEd Order No. 27 series of 2010 kun sa diin ginpahayag nga ang graduation ceremonies ang kinahanglan nga solemne kag nagakadapat para sa mga estudyante kag tagsa nila ka mga ginikanan kag indi sang lugar para sa mga aktibidad may kaangtanan sa politika.
Apang, ginapahanugutan naman nga mag-attend ang isa ka pulitiko sa graduation kun ini ang may bata nga maga-gradwar ukon magabaton sang award.
Magasugod naman ang Brigada Eskwela sa Hunyo 9 tubtob 13, kag natalana sa Hunyo 16, 2025 ang opisyal nga pagbukas sang School Year 2025-2026 kun sa diin preparado naman ang Department of education.
Nagapalab-ot naman sang pagpanginbulahan si Ballera sa mga ginikanan, mga estudyante kag mga manunudlo sa pagpanikasog nga matapos ang school year 2024-2025.
