Nangin inspirasyon sa madinalag-on nga pagkapasar sa Criminologist Licensure Examination 2026 ang determinasyon kag pagpabilin nga positibo sa kabuhi sang tumandok sang Barangay Dinginan, Roxas City.
Sa interview sang Bombo Radyo kay Ruwella Grace Aguas, iya ginpahayag nga bata pa lang ini, handum na niya ang mangin isa ka pulis rason nga nagpanikasog ini sa kurso nga Criminology.
Suno kay Aguas, nangin mabudlay ang pag-review bangud may mga pagpangduha-duha ini sa iya kaugalingon kun bala mapasar niya ang nasambit nga pasinawan.
Pahayag pa niya, comprehension kag pagfocus sa mga tulun-an ang nangin sekreto agud matigayon nga malampuwasan kag madinalag-on nga makit-an ang pangalan sini sa listahan sang mga pasado.
Tuman man ang pagpasalamat sini sa iya nga pamilya sa pagsuporta sa iya kag pagmotivate nga magpadayon agud matuman sini iya nga mga handum.
