ROXAS CITY – Panginbulahan sa Capiz Warriors Football Club matapos nag-1st runner up ang ila team sa Invitational Football Festival (3rd Pepsi Cup Soccer Tournament 2022) nga ginhiwat sa Brgy. Salihid Barotac Nuevo, Iloilo.
Ini ang labing una nga nagpasakop ang team sa guwa sang probinsya nga ginakalakipan man sang nagkalain-lain nga probinsya sa bug-os nga rehiyon VI.
Sa interview sang Bombo Radyo kay CWFC coach Jonifer Almeida, suno diri ang ila kadalag-an bilang 1st runner up isa ka daku nga oportunidad sa mga kabataan nga players bangud nagapakita lamang ini nga may yara sila sang ibuga kag potensyal.
Apisar wala nag-champion, suno sa iya daku na nga butang ang ila nakuha nga puwesto bangud sa 28 ka grupo nga nagpasakop wala sila nagdahom-dahom nga sila ang mangin 1st, dugang pa nga 1 ka semana lamang ang ila preparasyon.
Ginpakigbahin man sini nga bangud sa pandemya kag pagdumili sa physical activities, madugay sila nga wala nagkitaay gani nangin paghangkat man sa ila team ang pagbalik sa umpisa sang training.
Dugang pa ni Almeida nga pinaagi sa paghampang sang football, malikaw sa malain nga buluhaton kag bisyo ang mga kabataan gani amu nalang ang iya pagtinguhaa nga matipon ang mga players sa liwat.
Ginapangayo man sang coach ang suporta sang provincial kag city government mapapinansyal ukon sa equipment bangud nagapati siya nga malayo pa ang malab-ot sang iya players nga ginakalakipan sang mga estudyante sa elementarya, sekondarya kag kolehiyo sa nagkalain-lain nga buluthoan sa Capiz.
Sa pihak nga bahin, ginsiling naman sang Team Captain sang CWFC nga si John Emmanuel Guzman, engineering student, nga nagapati siya nga ang nagdala sa ila sa kadalag-an ang ila disiplina, bakas, komunikasyon kag koordinasyon.
Bilang lider, ginapakigbahin niya ang iya nahibaluan nga skills sa iya grupo kag gina-motivate ang isa kag isa, wala man nila ginapadugay kun may magluntad nga indi pag-intindihanay.
Nakita niya suno diri nga daku ang ila development gani tuman ang ila pagpasalamat kay football coach Almeida bangud wala sila ginapabay-an.
