ROXAS CITY – Natalana nga igapasaka ang kaso nga paglapas sa R.A 10591 ukon “Comprehensive Firearms and Ammunition Regulation Act” batuk sa anay katapo sang PNP nga ginserbehan sang search warrant sa Brgy. Duran banwa sang Dumalag subong nga adlaw, Setyembre 28.
Resulta ang operasyon sang “OPLAN paglalansag Omega” kun sa diin ginkasa sang gintingub nga puwersa sang CIDG Capiz PFU, Dumalag MPS, Capiz PPO-PIU, 602nd COY RMFB 6, Batallion RMFB 6, 1st PFMC Capiz Maneuver Platoon kag MARPSTA.
Ginkilala ang suspetsado kay Meldin Frio Frias, 54-anyos, residente sang nasambit nga Barangay kag wala nadakpan bangud wala ini sa iya puluy-an sang ginserbe ang search warrant.
Ang search warrant ang gin-isyu ni Hon. Judith D Orendain-Tonogbanua, Executive Judge, RTC Branch 20, Mambusao, Capiz napetsahan Setyembre 26, 2022.
Sa impormasyon nga nakuha sang Bombo Radyo nagikan sa CIDG Capiz, isa ka dismissed nga pulis ang suspek kag ginapahayag napreso ini sang mas o menus 10 ka tuig matapos nakapatay sang iya man kaupod nga pulis sa bahin sang Manila City.
Matapos sini nagpauli ang suspek sa nasambit nga banwa kag nag-angkon sang negosyo nga gasolinahan.
Nahibaluan nagpalab-ot sang impormasyon ang isa ka confidential informant sa otoridad nga nagahupot sang mga matag-as nga sahi sang armas-luthang ang suspetsado rason nga ginmonitor ini sang masobra isa ka bulan.
Suno sa CIDG Capiz wala nakuha sa puluy-an ang mga high powered nga armas-luthang nga 318 kag M16 nga yara sa search warrant, apang yara na sa ila paghinakop ang iban pa nga nakumpiskar kag kumpirmado nga expired ukon indi lisensyado ang mga ini.
Igapresentar naman ang mga ebidensya nga nakuha agud mapasakaan na sang kaso ang suspetsado nga padayon nga ginaayam sang otoridad.
