Ginpangunahan sang Department of Labor and Employment (DOLE) ang paglunsyar sang “TUPAD Tuloy Pasada” nga programa agud makahatag dugang kita sa mga tsuper sang jeep bangud sa padayon nga pagsaka sang presyo sang krudo sa pungsod.
Sa idalom sang programa, makabaton sang P695 kada adlaw ang inisyal nga 134 ka tsuper nga naga-biyahe sa mga ruta sa Metro Manila, nga kabaylo sang minimum wage sa rehiyon.
Ang amu nga bulig indi pa lakip sa ila regular nga kita sa pagbyahe.
Pagapilion man ang mga benepisyaryo pinaagi sa profiling kag validation sang DOLE, kun sa diin ang inisyal nga listahan pagakuhaon halin sa Land Transportation Franchising and Regulatory Board (LTFRB).
Samtang, ang mga tsuper nga wala pa makasulod sa listahan mahimo mag-apply sa pinakamalapit nga opisina sang DOLE pinaagi sa pagpresentar sang valid nga professional driver’s license.
Mabaton sang mga kwalipikado nga tsuper ang bulig nga tubtob sa 30 ka adlaw, bilang kabahin sang tikang sang DOLE agud mapagmag-an ang epekto sang mataas nga presyo sang krudo sa sektor sang pampubliko nga transportasyon.
Target naman sang programa nga masuportahan ang 50,000 ka tsuper sa bug-os nga pungsod, kag plano man nga palaparon ini para sa iban pa nga apektado nga sektor, lakip ang mga truck driver nga naga-deliver sang agricultural products.
