ROXAS CITY – Nagpaandam si Department of Labor and Employment (DOLE) Region 6 Director Sixto Rodriguez Jr. sa mga employer nga nagakadapat napatuman na ang dugang nga P37 tubtob P40 pesos sa daily minimum wage sang mga mamumugon bangud nangin epektibo ang pagtaas sang sweldo sang Nobyembre 19 pa.
Sa interview sang Bombo Radyo kay Director Rodriguez, iya ginpahayag nga nahangpan niya nga may yara sang indi mapatuman gilayon ang wage increase bangud wala ini nagatuon sa schedule sang payroll apang nagakadapat nga ipatuman ini sang retroactive ukon i-tingob ang dugang nga saka sa masunod nga sweldohanay.
Suno sa regional director, mahimo gid nga magpadulong ang mga mamumugon nga may concern ukon reklamo sa wage increase sa talatapan sang Department of Labor and Employment.
Pahayag niya, nagakadapat nga malakip man sa computation sang 13th month pay ang wage increase.
Nahibaluan nga epektibo sang Nobyembre 19, ang daily minimum wage sang non-agriculture, industrial kag commercial nga may masobra 10 ka mga mamumugon ang yara sa P550.
Samtang ang minimum wage sang non-agriculture, industrial kag commercial nga may manubo sa 10 ka mga mamumugon ang yara sa P525.
Ang minimum wage naman sang mga yara sa agrikultura ang yara sa P520.
Samtang ang mga kabulig sa balay naman ang may yara sang P6,500 nga bulanan nga sweldo.
