Ginapreparahan na sa karon sang Department of Transportation (DOTr) ang mga guidelines para sa distribusyon sang fuel subsidy nga ipakigbahin sa mga tuman nga maapektuhan sang pagtaas sang presyo sang krudo kag petrolyo bangud sa nagalala nga tensyon sa tunga sang Iran kag sang Israel.
Suno kay Transportation Secretary Vince Dizon, may yara sang naka-alokar nga P2.5 bilyon para sa fuel subsidies nga ipaambit sang departamento.
Dugang pa sini, ginapreparar na ang mga guidlines agud gilayon nga makakuha ang mga tsuper kag mga sektor nga tuman nga maapektuhan sang pagtaas sang presyo.
Ginsiguro man ni Dizon nga ang nasambit nga sabsidiya ang sigurado nga mabaton sang mga benepisyaryo sini bangud sa medyo bastante ang hawid nila nga pondo sa karon para diri.
Samtang, nagapanawagan man ang tiglikom sa mga transport groups kag pila ka mga operators nga indi na magpatigayon sang mga hublag-protesta bangud nga may yara na sang bulig nga manog-abot kun sa diin ang nangin direktiba ni Presidente Ferdinand Marcos Jr. nga gilayon nga ipanagtag sa mga nagakinahanglan ang nasambit nga subsidiya.
Una naman nga ginsiguro sang Department of Energy (DOE) nga padayon na sila nga naga-apelar sa mga oil companies nga hatagan sang maskin gamay nga discounts ang mga drivers agud malikawan man ang posible nga taas-pamasahe sa mga komyuters.
