Ginpakigbato ni Department of Public Works and Highways (DPWH) Secretary Vince Dizon ang hingyo sang ahensya nga mabalik ang ginbuhin nga bahin sang 2026 budget, kun sa diin ginsiling sini nga wala nila ginabalik ang anay mataas nga presyo sang mga proyekto kag wala man sang ginapabalik nga mga ginkakas nga proyekto.
Suno kay Dizon, ang ginahingyo lamang sang DPWH amo ang halos P45 billion nga ginbuhin bangud sa bag-o nga Construction Materials Price Data agud masigurado nga mapatuman sang insakto ang mga proyekto.
Gin-ako man sini ang sitwasyon nga nadulaan sang pagsalig ang publiko sa ahensya tuga sang mga anomaliya sa flood control projects, apang ginasigurado sini nga may mga reporma nga ginapatuman agud malikawan overpricing kag masigurado ang transparency sa implementasyon sang mga proyekto.
