ROXAS CITY-Ginkakibot sang anay Chief of Hospital sang Mambusao District Hospital ang hinali nga pagkakas sa iya bilang hepe sang nasambit nga ospital.
Sa interview sang Bombo Radyo sa kay Dr. Florencio Luching ginkompirmar sini nga ginkakas na ini bilang Chief of Hospital sang Mambusao District Hospital matapos nga nakabaton ini sang memorandum gikan sa kay Provincial Administrator Edwin Chinel Monares sang tinalikdan nga Oktubre 13 sini nga tuig.
Suno sa kay Luching nga baton sini ang desisyon sang probinsiya natuhoy sa pagkakas sa iya sa puwesto apang wala ini nakahibalo sang matuod nga rason sang pagsaylo sa iya bilang coordinator sang Out-Patient Department sang Roxas Memorial Provincial Hospital sa Barangay Lanot sining siyudad.
Wala man nabutang suno diri sa memorandum ni Monares sang rason sang pagkakas sa iya bilang hepe sang amo nga hospital.
Naglaum si Luching nga igapatawag ni Capiz Governor Esteban Evan Contreras agud ipaathag sa iya ang rason sang iya pagsaylo apang tubtob subong wala pa ini natabo.
Gindugang pa ni Luching nga blanko ini sa tinutuyo sang probinsiya sa pagkakas sa iya apang nagapati ini nga may yara sang madalom nga rason ang probinsiya para kakason ini sa puwesto.
Ginadudahan sang nasambit nga doktor nga posible may kaangtanan ini sa madamo nga reklamo sang mga pasyente sa amo nga ospital kalakip na pagpamalibad sini nga I-admit ang isa babayi nga nagabusong nga gindugo kag gindala sa amo nga ospital.
Gindugang pa ni Luching nga may yara sang isa ka wala matumod nga mayor sa probinsiya nga nagreklamo man batuk sa iya.
Mahibaluan nga gintal-usan ni Dr. Ian Arcega si Luching bilang Chief of Hospital sang Mambusao District Hospital sang tinalikdan nga Oktubre 13,2020.
