ROXAS CITY – Pilas sa magkatuhay nga parte sang lawas ang naangkon sang driver sang motorsiklo, matapos maipit sang duha ka salakyan sa Brgy. Banica, Roxas City.
Ginkilala ang mga naulamid sa insidente nga sanday Henry Coronado, yara sa legal nga pang-edaron kag residente sang Brgy. Dumolog, Roxas City driver sang Yamaha YTX 125 MC nga motorsiklo.
Samtang ang driver naman sang Nissan Sedan ang ginkilala kay Abel Acolentaba, 57-anyos government employee sakay ang iya asawa nga si Anita Acolentaba lunsay mga residente sang Brgy. Cabugao Oeste Panay, Capiz.
Ang driver naman sang Toyota Fortuner ang ginkilala kay Sunny Dalida, 62-anyos, retired seaman kag residente sang St. Francis Subd., Barangay Tanque kag Mycar Bacelonia, 42-anyos kag residente sang East Groove Subdivision Brgy. Banica, sining syudad.
Sa impormasyon nga nakuha sang Bombo Radyo nagikan sa Roxas City PNP, ginapahayag nga samtang yara wala nga dalan si Bacelonia sakay sang iya salakyan kag magatabok kun tani sa pihak nga dalan aksidente ini nga nadulaan sang kontrol sa pagmaneho.
Kabangdanan agud bumunggo sa motorsiklo ni Coronado nga nagikan sa banwa sang Panay kag padulong kun tani sa syudad sang Roxas.
Bangud sa impact, aksidente man ini nga bumungo sa Nissan Sedan nga ginamaneho ni Acolentaba nga nagikan naman sa syudad kag padulong naman kun tani sa banwa sang Panay.
Naulamid man ang naka-parked nga Toyota Fortuner nga salakyan ni Dalida.
Nag-angkon sang pilas sa magkatuhay nga parte sang lawas si Coronado nga madasig naman ginrespondihan sang katapo sang Roxas City Emergency Response Team (RCERT) agud hatagan sang pauna nga pagbulong antes ginpadangat sa isa ka pribado nga ospital subong man ang asawa ni Acolentaba.
Maswerte naman nga wala napilasan sanday Dalida kag driver sang Nissan Sedan.
Sa karun yara na sa kustodiya sang Roxas City Police Station ang mga salakyan kag motorsiklo para sa nagakaigo nga disposisyon.
