ROXAS CITY – Ginsalakay sang mga katapo sang Philippine Drug Enforcement Agency (PDEA)-Capiz ang ginakabig drug den sa Purok II, Sitio Cabral, Barangay Dayao, Roxas City.
Ginkilala ang subject person nga si Marco Laserna, drug den maintainer kag residente sang amu nga lugar.
Sa interview sang Bombo Radyo kay Punong Barangay Wenie Batuampo, nakapalagyo si Laserna matapos nga natunogan nga katapo sang PDEA ang iya ka-transaksyon kag nadala pa ang buybust money.
Suno kay Batuampo, anay drug surrenderree si Laserna kag pasulit-sulit naman nga ginapahanumduman sang council nga untaton na anuman nga iligal nga buluhaton matapos natalupangdan ang liwat nga pagdamo sang parokyano nga nagapadulong sa ila balay.
Kaangut sini, wala nakapalagyo ang kaupod ni Laserna nga si Jay-R Alcazaren, residente sang Barangay Culasi, sini nga syudad sa diin nakuha sa posesyon ni Alcazaren ang isa ka sachet sang ginapatihan iligal nga droga.
Sa karon, mas pasangkaron pa ni Batuampo ang pagmonitor kag presensya sang mga BPAT member ilabi na sa mga maligwin kag madulom nga lugar.
