Nagpanawagan ang mga biktima sang drug war sa International Criminal Court (ICC) nga indi paghatagan sang provisional release si anay Presidente Rodrigo Duterte suno sa Office of Public Counsel for Victims (OPCV).
Sa 18 ka pahina nga sabat nga ginsumiter sang Hunyo 25, ginpanindugan sang Office of Public Counsel for Victims (OPCV) nga delikado para sa mga biktima kag saksi kun hilwayon si Duterte, ilabi na nga may yara na ini sang ebidensya kag impormasyon sa mga saksi. Ginsambit man ang mga report sang pagpang-harass gikan sa iya mga sumalakdag.
Gindugang nila nga indi dapat pagsaligan ang promisa ni Duterte nga magbalik sa trial, ilabi na nga wala niya ginakilala ang hurisdiksyon sang ICC. Ginsambit man nila ang padayon nga impluwensya sang pamilya Duterte sa politika kag ang mga protesta nga nagapanawagan sang iya kahilwayan.
Ang iya edad nga 80 indi man bastante nga rason para sa provisional release, magluwas lang kon may yara sang dinalian nga kinahanglanon sa medisina.
Suno sa OPCV, nagapati ang mga biktima nga ang lamang nga pamaagi agud masiguro nga magapangatubang sang kaso si Duterte amo nga magpabilin ini sa kustodiya sang ICC.
