ROXAS CITY -Nagpaandam ang talatapan sang Department of Social Welfare and Development Region 6 ukon DSWD Region-6 nga mahimo mapasakaan sang nakaigo nga panumbungon ang mga barangay officials nga naglapas sa pagsulundan sa pagpanghatag sang bulig pinansiyal sa idalom sang Social Amelioration Program (SAP) sang ahensiya.
Ini ginpahayag ni DSWD Assistant Secretary Rhea Peñaflor sang mainterview sang Bombo Radyo.
Suno sa kay Peñaflor nga mahimo ireklamo sa talatapan sang DSWD ang nasambit nga barangay officials kun sa diin igatugyan ini sang ahensiya sa Department of the Interior and Local Government ukon DILG para sa dugang nga imbestigasyon.
Gindugang pa sini, mahimo nga mapasakaan sang panumbungon sa Office of the Ombudsman ang mga barangay officials nga mapamatud-an sang DILG nga naglapas sa pagsulundan sang nasambit nga programa.
Samtang nagpaandam man si Peñaflor nga magapangatubang sang kaso kriminal kag administratibo nga may nakaigo nga kapresuhan ang sinuman nga barangay officials nga mapamatud-an nga nagalapas sa guidelines.
Kalakip sa mga dumilian sang DSWD ang pagbuhin sa mga mabaton nga kwarta sang mga benepisyaryo kag paglakip sa mga malapit nga mga himata sang mga barangay officials sa listahan sang mga makabaton sang nasambit nga bulig-pinansiyal.
