Hugot nga ginpanginwala ni Department of Trade and Industry (DTI) Secretary Cristina Roque ang isa ka dokumento nga nagalapta sa social media nga ginaalegar may sulod sang mga concessions sang Pilipinas kabaylo sang trade agreement sa Estados Unidos.
Suno kay Roque, peke ang dokumento kag peke man suno diri ang pirma niya. Gintawag niya ini nga himo-himo kag may malain nga motibo, labi pa kag sensitibo ang istorya kag kadungan sang pagbisita ni Presidente Ferdinand Marcos Jr. sa Washington D.C. agud makighinun-anon kay U.S. President Donald Trump.
Ang nasambit nga dokumento, nga gin-post sang isa ka blogger sa Facebook, ang nagasiling nga bukas ang Pilipinas sa pagbuhin sang taripa sa mga produkto sang U.S., pagpadasig sang pagpangapital sa langis kag gas, kag paghatag sang priviledge access sa mga mineral resources.
Ginganyat ni Roque ang publiko nga indi pag-ipalapta ang dokumento magtutok na lang sa opisyal nga impormasyon nagikan sa gobyerno.
Madumduman nga kaupod si Roque sa delegasyon ni Presidente Marcos nga nakigsinapol sa mga opisyal sang Amerika para sa negosasyon sa taripa kag trade deal.
