Nagnubo ang unemployment rate halin sa 4.9% sadtong nakaligad nga tuig nga sa karon yara na sa 4.7% kag indi dapat mag-untat ang pagduso sa dugang nga sweldo kag benepisyo sa mga mamumugon.
Pahayag ni Trabaho Partylist spokesperson Atty. Filemon Ray L. Javier nga dapat sa gihapon nga hatagan sang pagtamod ang pagpasaka sang sweldo kag pagtan-ay sang dugang nga benepisyo bilang sabat sa padayon nga panawagan sang mga mamumugon.
Suno sa Trabaho Partylist, maayo man nga balita nga may trabaho bisan paano ang mga mamumugon apang indi dapat diri mag-untat ang pag-uswag kundi dapat pa nga iduso ang mataas nga kalidad sang trabaho, disente nga sweldo kag dugang nga benepisyo.
Dugang pa ni Atty. Javier nga dapat sa gihapon nga tutukan ang pagkontrol sang inflation kag pagpanami sang kalidad sang trabaho, nga kalakip sa mga “most urgent national concerns” sang mga pumuluyo.
Ginkilala man sang Trabaho Partylist ang kadalag-an sang administrasyon matapos ini makadugang sang halos isa ka milyon nga trabaho sa pungsod kun ikumparar sadtong nakaligad nga tuig, partikular sa sektor sang konstruksyon. Apang, apisar nagnubo ang unemployment, may yara sa gihapon nga 2.38 milyon nga Pilipino nga wala sang trabaho sadtong Hulyo 2024 kag isa sa mga nagapanguna nga rason sini amo ang pagsulod sang mga bag-o nga graduate sa labor market nga wala gilayon nakapangita sang trabaho.
