SIGMA, CAPIZ- Nagapangayo sang dugang nga mga food packs ang local government unit sa banwa sang Sigma sa Office of the Civil Defense para sa mga pumuluyo nga apektado sang malapnagon nga pagbaha nga dala sang Bagyo Ramil sang Oktubre 18, 2025.
Sa interview sang Bombo Radyo kay Mayor Dante Rizal Eslabon sang banwa sang Sigma, iya ginpahayag nga sa gihapon kulang pa ang mga food packs nga ginpanagtag sa mga apektado nga mga pumuluyo.
Suno kay Eslabon, magluwas sa food packs, nagapangayo man sila sang tubig nga mainom.
Pahayag nya, sa ginpatigayon nga aerial inspection kaupod ang Office of the Civil Defense sa pagpanguna ni USec. Harold Cabreros, Administrator sang nasambit nga ahensya, nakita nila ang pila ka mga pumuluyo nga nagagamit sang balsa para lang nga makatabok sa pihak nga bahin kag makakuha sang mga kinahanglanon.
Nahibaluan nga yara sa 19 ka mga kabarangayan ang apektado sa diin 6,950 ka mga pamilya ukon kabaylo sa 26,508 ka mga indibidwal ang naapektuhan sang amo nga malain nga tyempo.
Sa inisyal nga datos nga ginpaguwa sang Municipal Agriculture Office, nagdangat na sa masobra P31 Million pesos ang kahalitan nga ginbilin sa agrikultura, samtang yara naman sa masobra P25 million pesos ang sa mga imprastruktura sandig naman sa inisyal nga datos nga ginpagwa sang Municipal Engineering Office.
Dugang pa sang natungdan, padayon sila nga nagahimo sang mga tikang agud nga mahatagan sang gilayon nga bulig ang mga apektado. Nagpasalig naman ang alkalde, nga sa malab-ot sang ila nga masarangan, igahatag sa mga pumuluyo nga naapektuhan ang amo nga bulig. Nagapangabay man ini sang bulig pagid para sa mga pumuluyo nga nasakupan.
Interviewed by Bombo Francis Biñas
