CAPIZ – Daku ang nangin kabahin sang duha ka Capiznon National Artist sa kultura kag sining sang probinsya sang Capiz.
Sa interview sang Bombo Radyo kay Mr. Christian George Acevedo, Head Librarian sang Capiz State University-Main Campus, iya ginpahayag nga ang amo nga mga National Artists ang naghatag sang dungog kag nagdala sa pangalan sang probinsya sa patag sang musika kag teatro.
Si Jovita Fuentes nga national artist for music kag ginakilala man nga First Lady of Philippine Music.
Samtang, si Daisy Hontiveros Avellana naman amo ang National Artist for theater nga nakapakita man sang iya sini nga talento sa pag-arte sa international stage.
Suno kay Acevedo, ang mga kadungganan sining mga national artist ang nangin pamaagi man agud nga matuytuyan ang mga bag-o nga henerasyon sa tradional music apisar sa moderno nga panahon.
Pahayag pa niya, subong nga National Arts Month, madamu sang mga aktibidad nga ginapatigayon lakip na ang Pasinaya Festival kun sa diin ginapakita ang talento sang mga grupo sa nagkalain-lain nga patag sang sining.
Dugang pa sang natungdan, importante nga ilakip ang sining sa pang-adlaw-adlaw bangud nagahatag ini sang matahom nga duag sa pagpangabuhi sang isa ka tawo.
