Magapangatubang sang kaso nga Reckless Imprudence Resulting to Double Homicide and Damage to Properties ang duha ka mga driver sang magkatuhay nga salakyan nga aksidente nga nakabunggo sa mag-iloy sa Brgy. Bitoon Ilaya, Cuartero, Capiz.
Ini ang ginpahayag ni Cuartero Municipal Police Station Chief PCAPT Alladen Talaban sang ma-interview sang Bombo Radyo.
Matandaan nga patay ang mag-iloy nga biktima nga ginkilala nga sanday alyas Ivy, 20-anyos, kag ang 2 months old sini nga lapsag nga sanday alyas Cha nga lunsay mga residente sang nasambit nga lugar.
Samtang ang mga driver suspect naman sang mga salakyan nga nakabunggo sa nasambit nga mga biktima ang ginkilala kay alyas Clyde, 24-anyos nga residente sang Brgy. Salvacion Habog-Habog, Molo, Iloilo City kag ang driver naman sang isa pa nga salakyan ang ginkilala kay alyas Ben, 46-anyos, isa ka businessman nga residente naman sang Brgy. Mongpong, Roxas City.
Sandig sa imbestigasyon sang Cuartero PNP, samtang ginasubay sang tricycle sakay ang mga biktima ang dalan padulong sa banwa sang Cuartero sang aksidente ini nga ma-side swipe sang salakyan nga ginamaneho ni alyas Clyde nga ginasubay man ang pareho nga direksyon rason nga nag-apok ang mga biktima sa pihak nga linya.
Aksidente man nga nabungguan ang mag-iloy sang isa pa nga salakyan nga nagikan sa pihak nga lane nga ginamaneho naman ni alyas Ben, nga nangin rason sang kamatayon sang mga biktima.
Sa karon, nagapabilin sa kustodiya sang Cuartero PNP ang mga driver sang salakyan nga aksidente nga nakabunggo sa mag-iloy, samtang padayon naman ang imbestigasyon sang mga kapulisan sa natabo nga insidente.
