ROXAS CITY, CAPIZ- Arestado, ang duha ka mga indibidwal matapos nga nakuhaan sang ginpatihan iligal nga droga sa ginpataigayon nga drug buybust operation sang mga katapo sang Roxas City Police Station kag Philippine Drug Enforcement Agency (PDEA), sa Barangay IX, Roxas City.
Ang mga nadakpan amo sanday alyas ‘Bryan’, 36-anyos, kag alyas ‘Joan’, 33-anyos nga lunsay mga residente sang Barangay Cagay, Roxas City.
Sa interview sang Bombo Radyo kay Police Chief Master Sergeant Ramil Arcangeles, tigpamaba sang Roxas City Police Station, iya ginpahayag nga pamaagi sa isa ka pulis nga nagpakuno-kuno poseur-buyer, natigayon nga naaresto ang amo nga mga subject persons.
Nakuha sa paghinakop sini ang duha (2) ka sachets sang ginapatihan shabu, P2,000 nga cash nga buybust money, wallet kag tatlo ka mga lighter.
Nagapangatubang ini sa karon sa kaso sa paglapas sa Republic Act 9165 ukon ‘Comprehensive Dangerous Drugs Act of 2002.’
Sa karon, yara na ang mga ini sa kustodiya sang Roxas City Police Station para sa nagakaigo nga disposisyon.
With a report from Bombo Sunnie Mae Constantino Batencila
