Hugot nga gin-kondenar sang duha ka senador ang panibag-o nga pag-atake sang China Coast Guard (CCG) sa duha ka mga barko sang Pilipinas malapit sa Pag-asa Cay 2 sa West Philippine Sea (WPS).
Natabo ang insidente samtang ang mga barko sang Bureau of Fisheries and Aquatic Resources (BFAR) nagapatigayon sang routine mission kaupod ang scientific team agud mangolekta sang sampol sang baybay ukon balas.
Suno kay Senate Committee on National Defense Chairman Senador Jinggoy Estrada, indi na makakilibot ang agresibo nga aksyon sang China Coast Guard (CCG) labi na nga madugay na nila ginahingabot ang maritime scientist kag uniformed personnel sa sulod sang pila ka tuig.
Apang, suno sa iya, indi mahimo sang mga ini nga hadlukon ang pungsod kag padayon ini nga manindugan sa pagpamatok sa kada paglapas sa soberanya kag kinamatarong sang pungsod.
Gin-suggest pa ni Estrada nga maghimo ang pungsod sang isa ka mapag-on kag malinaw nga diplomatiko nga protesta batuk sa padayon na mga paglapas sang China.
Bangud sa agresibo ng aksyon sang China, suno sa iya kinahanglan sang pungsod nga pabaskugon ang pakig-alyansa sa mga pungsod nga kapareho naton sang panindugan para sa kalinong, kapag-on, kag pagrespeto sa batas sa rehiyon.
Nagpanawagan man si Senador Joel Villanueva sa Department of Foreign Affairs (DFA) nga tun-an ang tanan nga posible nga tikang agud gilayon nga makahimo sang panibag-o nga diplomatiko nga protesta batuk sa China.
Hugot nga ginsiling sang senador, nga indi lamang ini ang pagprotekta sa soberanya kag sovereign rights – kundi ini ang bangud sa kabuhi kag kaluwasan sang mga pumuluyo.
