Duha tubtob tatlo ka bagyo, posible nga magsulod sa PAR subong nga Hulyo – PAGASA
Ginabanta nga duha tubtob tatlo ka bagyo ang posible nga magsulod sa Philippine Area of Responsibility (PAR) subong nga bulan sang Hulyo suno sa Philippine Atmospheric, Geophysical and Astronomical Services Administration (PAGASA).
Ginpahayag sang PAGASA nga may tyansa ang mga bagyo nga mag-landfall sa lupa sa Visayas ukon Central Luzon, ukon mag-agi malapit sa Batanes.
May posibilidad man nga magbag-o sang direksyon ang amo nga mga bagyo, apang magatuga ang mga ini sang pagpabaskog sang Habagat ukon Southwest Monsoon.
Kinaandan nga mas madamo nga bagyo ang nagasulod sa pungsod kada Hulyo, suno sa PAGASA.
Subong nga Martes, ginabantayan sang weather bureau ang isa ka low pressure area malapit sa Quezon nga may medium chance nga mangin isa ka tropical depression.
