Ginhatagan pagtamod ni Tingog party-list Rep. Jude Acidre nga dapat basehan sang mga mamalidha ang mga deliberasyon sa mga ebidensya kag indi ang palaabuton nga 2028 presidential elections sa paghinun-anon sa impeachment complaint batuk kay Vice President Sara Duterte.
Ginhimo ni Acidre ang pahayag samtang nagapreparar ang House Committee on Justice para sa hearing nga natalana sa Abril 22, sa diin ginalauman nga igapresenta ang dugang nga ebidensya may kaangtanan sa mga reklamo nga ginpasaka batuk kay Duterte.
Suno kay Acidre, apisar nga normal lang ang pagkabalaka kag pagpangduha-duha sang pila ka mga kongresista bangud sa political implications sang nasambit nga bagay, indi dapat likawan ang pamangkot kun dapat bala nga i-impeach si VP Sara kag kun may nahimo ini nga dapat manabat.
Dugang pa sang mamalidha, importante nga ikonsidera nga ang posisyon kag mabaskog nga mandato sang isa ka mataas nga opisyal sang gobyerno ang may implikasyon sa masunod nga eleksyon, gani nagakadapat lamang nga hatagan sang balanse nga paghangop ang publiko sa nasambit nga isyu.
Ginhatagan man pagtamod ni Acidre ang importansya sang maid-id nga pag-usisa sa mga ebidensya, ilabi na sa mga current myembro sang Kamara nga indi kabahin sang 19th Congress sang ginpatigayon ang mga nauna nga imbestigasyon sa ginaalegar iregularidad sa paggamit sang pondo.
Sa subong, padayon nga gina-review sang House Committee on Justice ang mga ebidensya agud mahibaluan kun may yara sang probable cause nga magatugot sa pag-file sang impeachment complaint sa Senado, nga magaserbe nga impeachment court.
Samtang nagapabilin nga isa sa mga nagapanguna si Duterte sa mga survey para sa 2028 presidential elections.
