ROXAS CIT – Gin-relieve na bilang frontline sevices personnel ang isa ka babaye nga empleyado sang Roxas City Hall, matapos ang ginapahayag pagpakita sang indi maayo nga batasan sa nagabayad.
Matandaan nga nakakuha sang nanari-sari nga komento nagikan sa publiko, ang post ni alyas “Makmak” may kaangtanan sa iya naeksperyensyahan sang siya ang nagkuha sang cedula sa amu nga talatapan.
Base sa ginpakigbahin sini nga pag-abot niya sa cashier gindaho niya sini ang iya kwarta nga P500.00 agud kuntani magbayad sang P105.00, apang ginbalik ini sa iya sang kahera kag ginpapangitaan sang sensilyo kung sa diin gintudlo pa siya sa isa pa ka kahera apang nagpamalibad man ini nga wala sang may ihatag.
Bangud sini, liwat nga nagbalik si alyas “Makmak” sa una nga kahera kag ginhatag nalang ang P500.00 apang nagbuya ini sang tinaga nga “wala sila sang sensilyo, kag indi sila sang tindahan” kabangdanan nga ginkalain sang iya buot.
Suno sa tagreklamo tuman siya nga nadismaya sa ginpakita nga batasan sang kahera bangud kun lantawon suno diri indi sang kasubong sini nga batasan ang ginapakita sang isa ka frontline services personnel ilabi na nga sa idalum sang gobyerno.
Kaangut sini sa pagpakig-angut sang Bombo Radyo sa Head sang Roxas City Communication Group nga si Mr. Melvin Galagate, matapos makalab-ot sa ila talatapan ang nasambit nga isyu gilayon sila nga nagpatigayon sang maid-id nga imbestigasyon kag ginpahimo sang explanation letter ang amu nga empleyado.
Sa idalum sang ginpapanaog nga memorandum kaungdan sini nga ginpakamaayo nga gin-relieve sa iya puwesto bilang cashier ang ginreklamo kag ginhalin sa iban nga posisyon.
Dugang pa ni Galagate nga ini ang labing una nga natabo nga may nagreklamo sa amu nga empleyado.
Samtang ginapasiguro man sang pamunuan nga ang kasubong sini nga pagbinatasan wala nila ginatolerar.
Mensahe sini sa tanan nga mga empleyado sang publiko nga panindugan ang obligasyon kag ihatag ang mas maayo nga serbisyo.
