ROXAS CITY – Tuman ang kalipay nga nabatyagan sang newly elected mayor sang banwa sang Dao matapos nga nagmadinalag-on ini sa iya kandidatura.
Sa interview sang Bombo Radyo kay Engr. Jimbo Nonong Barruela, ginpahayag sini nga wala niya ginalauman ang iya kadalag-an bangud mapag-on ang iya kasumpong.
Nagpalab-ot man ini sang pagpasalamat sa mga pumuluyo sang ila banwa kag ilabi na sa iya mga supporters nga nagbulig agud malab-ot niya ang iya kadalag-an.
Nagpromisa si Barruela nga pagabag-uhon niya ang sistema sang nagligad nga administrasyon kag ihatag niya ang kinahanglanon sang mga pumuluyo sa nasambit nga banwa.
Aminado man si Barruela nga nagapangduha-duha pa siya sa iya kandidatura apang sang nakita niya ang bug-os nga suporta sang iya kasimanwa ini ang nagtulod sa iya agud magpadayon.
Nagapasalamat man ini bangud nagdaog ang iya ka tandem nga si Panoy Daños sa pagka-vice mayor kag isa ini nga nakabulig sa iya kadalag-an. Nagpasalig man ini sa mga Daonhon nga tumanon ang iya mga promisa kag magaserbisyo ini sang tampad.
