Ginkumpirmar ni Senate President Francis “Chiz” Escudero nga indi magpatigayon sang impeachment trial kay Vice President Sara Duterte samtang naka-break ang session sang Kongreso.
Sa press briefing, ginpahayag ni Escudero nga kinahanglan ang plenaryo sang Senado para masuguran ang impeachment court.
Kahapon, nag-adjourn na ang session sang Senado agud maghatag ligwa sa nagahilapit nga campaign period para sa 2025 national and local elections.
Ginsumiter man kahapon ni House Secretary General Reginald Velasco kay Senate Secretary General Renato Bantug ang article of impeachment batuk kay VP Sara kun sa diin 215 ka miyembro sang House of Representatives ang nagpabor nga pahalinon ang bise bangud sa ginaalegar nga paglapas sa saligang batas, paggguba sang pagsalig sang publiko, anomalya kag iban pa nga krimen.
Magabalik ang sesyon sang Kongreso sa Hunyo 2.
