ROXAS CITY-Lipong nga gindala sa ospital ang 18-anyos nga babayi matapos nga aksidente nga nabungguan sang salakyan samtang nagatabuk sa dalan sa Calipayan Street, Barangay X, Roxas City.
Ginkilala ang biktima nga si Chrisny Jam De Juan residente sang Poblacion Ilaya, Dao Capiz.
Sandig sa inisyal nga imbestigasyon sang traffic section sang Roxas City Police Station nga samtang nagatabuk sa pihak nga karsada ang biktima agud magsakay sa tricycle,aksidente ini nga nabungguan sang Suzuki Alto Hatch Back nga ginamaneho si Fruel Eroy, 34-anyos residente sang Barangay Damayan, Sapian Capiz.
Nag-angkon sang pilas sa magkatuhay nga porsyon sa kalawasan ang biktima nga gindala sang Capiz Emergency Response Team (CERT) sa Capiz Doctors Hospital kag padayon nga ginabulong.
Samtang yara na sa kustodiya sang mga kapulisan ang driver sang amo nga salakyan.
