ROXAS CITY – Ginalauman na sang mga fanatics sang hubon nga Golden State Warriors nga sila na ang mangin madinalag-on sa Game 2 sang best of seven series sang 2022 NBA Finals, nga patigayunon sa gihapon sa homecourt sang GSW sa Chase Center sa San Francisco, California, USA.
Ini ang ginpahayag ni Mr. Raffy Fernando, Bombo International Correspondent sa Estados Unidos, sang mainterview sang Bombo Radyo.
Suno diri, panigurado nga madamo gid sang mga naghibi sa nangin kalutusan sang Warriors kahapon nga adlaw, bangud madamo sang nagpusta pabor sa sini nga hubon, bangud nga ila ang teritoryo.
Apang, sa fourth quarter, nahuy-an ang team ni Stephen Curry apisar sang iya ginpaulan nga tres sa third quarter.
Nagbawi kag nagpaulan sang three points ang nagbakas nga team ni Jayson Tatum nga sanday Jaylen Brown, Derrick White, Al Horford, kag iban pa.
Gani sa maabot nga Lunes nga adlaw, balantayan ang mangin diskarte nga ipakita sang duha ka mga hubon agud mangibabaw sa hinampang.
Mapatas gid man bala ayhan sa 1-1 sang Golden State Warriors? ukon mapahuya-huya sila gihapon sa ila homecourt kag mangin 2-0 pabor sa Boston Celtics?
Bantayan ang hinampang, sa Hunyo 6, alas-8 sa aga, diri sa gihapon sa Bombo Radyo Roxas nga blow-by-blow coverage sang Game 2 sang 2022 NBA Finals.
