ROXAS CITY – Ginpa-lockdown sang duha ka adlaw ang Filamer Christian University (FCU) bilang ila nga local measures sa Coronavirus Disease (COVID-19).
Ini ang ginpahayag ni FCU Vice President for Administrations Georgen Gregorio sang ma-interview sang Bombo Radyo Roxas.
Suno kay Gregorio nga antes sila nakabaton sang text message natuhoy sa ‘bomb scare’ sadtong Marso 9 ila na nga ginaplanohan ang pagdeklara sang suspension agud ma-sanitized ukon malimpyohan ang ila nga buluthuan.
Bangud diri, gilayon naman nga nagsapol ang mga manunudlo kag opisyales sang unibersidad para sa isa ka academic council meeting agud matalakay ang mga tikang nga himuon batuk sa COVID-19 kag ang nabaton nga bomb scare.
Ginpahayag ni Gregorio nga antes nabaton ang bomb threat ginkansela na sang FCU ang klase bilang tikang sa pamahog sang COVID-19.
Magluwas sa pag-sanitize sang kada hulot isa sa mga tikang sang FCU ang magpahamtang sang mga sanitizers sa kada departamento, mga hulot-klasehan kag comfort rooms.
Obligahon naman ang mga estudyante nga magdala sang ila tagsa ka hand sanitizers kag alcohol.
Samtang natuhoy naman sa nabaton nga bomb threat, gilayon nga nagpadulong sa Roxas City Police Station si Gregorio agud magpangayo sang responde sa mga kapulisan agud ma-assess ang buluthuan.
Nagapati si Gregorio nga yara lamang sa syudad sang Roxas ang naghimo sang pagpamahog.
May ginasundan naman nga motibo ang mga otoridad kag ang mga opisyales sang FCU kun sino ang may kahimuan sini.
Ginapatihan ni Gregorio nga may kahilabtanan ini sa bag-o gid lamang nagtakop nga student council election kag wala naman ginadula ang posibilidad ang nagahilapit nga final exam sang mga estudyante.
Gindugang pa ni Gregorio nga posible sadtong Marso 9, Lunes nga adlaw ang nakita nga tion sang suspek nga magpadala sang ‘bomb threat’ bangud nagapadayon ang ila nga FCUSR week subong semana.
Sa karon may yara naman sang persons of interest ang mga otoridad apang indi pa ini mapalayag sa publiko bangud nagapadayon pa ang imbestigasyon.
