ROXAS CITY – Nagpadulong sa probinsya sang Capiz ang mga personnel sang Department of Public Works and Highways (DPWH) Central Office agud mag-inspeksyon kag imbistigahan ang mga nagkalaguba nga proyekto nga river flood control sa barangay Balatucan kag iban pa nga kabarangayan sa banwa sang Panitan.
Ini ang kadungan sang nakalab-ot nga reklamo sa nasambit nga talatapan nga may alegasyon sang anomaliya kag wala masunod nga insakto nga implementasyon sang mga proyekto rason nga nagkalaguba ini apisar wala pa matuigan sang naglaslas ang Bagyong Agaton sang nanligad nga bulan sang Abril.
Sa nakuha nga impormasyon sang Bombo Radyo nagaguwa nga si Mr. Anactacio Duran ang nagpalab-ot sang reklamo natuhoy sa iregularidad sang DPWH Capiz 1st Engineering District sa implementasyon sang proyekto nga River Control sa amu nga banwa.
Samtang nagpamalibad naman nga magsabat ang pamunuan sang DPWH Capiz 1st District sa Bombo Radyo kag ginpahayag ni Asst. District Engr. Roy Pacanan nga nagsumiter na sila sang written explanation kag hulaton nalang ang resulta sang imbistigasyon sang Central Office sang DPWH.
Matandaan nga nahuman ang amu nga proyekto nga nagalab-ot sa ginatos ka milyon ka pesos ang pondo sa tiempo nga si Engr. Randolfo Melo Santos pa ang nagapungko nga District Engineer.
