Ginapanindugan ni anay Commission on Elections (COMELEC) Commissioner Atty. Rowena Guanzon nga dapat nga mag-resign na si President Ferdinand Marcos Jr. matapos nagsarurot sang 40% ang foreign direct investments (FDI) sang Pilipinas.
Sa interview sang Bombo Radyo kay Guanzon, iya ginpahayag nga nagakadapat nga maghalin na sa pwesto ang Presidente bangud indi na insakto ang mga desisyon sini kag bangud sa mga nagalala nga korapsyon nga nagapanubo sang kumpyansa sang mga foreign investors kag nagapaantos sa mga Overseas Filipino Workers nga nagalaum sa pag-umwad sang ekonomiya.
Base sa Bangko Sentral ng Pilipinas, nagnubo sa $494 million ang FDI sang Agosto gikan sa $830 million sang nagligad nga tuig.
Ang pagnubo ang nagapanguna nga rason sang dako nga pagnubo sang investments sa debt instruments nga nagsarurot sang 73.8% sa $553 million sang Agosto 2024 tubtob nga nangin $145 million subong nga tuig.
Nagnubo man ang reinvestments sang kita sa 3.6%, humalin $210 million nga nangin $203 million.
Pahayag ni Guanzon, indi na masarangan nga antuson sang Pilipinas ang padayon nga korapsyon kag kinahanglan na sang lider nga makapabalik sang pagsalig kag kumpyansa sa mga foreign investors.
Samtang, nagapati man ang natungdan nga adik si President Marcos kaangay sa ginbuyagyag mismo sang presidential sister nga si Senator Imee Marcos.
