Nagapanawagan si Former Kabataan Partylist Representative Raoul Manuel, nga tapuson na ang Enhanced Defense Cooperative Agreement sa tunga sang Pilipinas kag Estados Unidos sa America.
Ini matapos sa nagalala nga tensyon sa mga pungsod sa Middle East nga nagresulta sa kamatayon sang madamu ka mga sibilyan lakip na ang isa ka Pinay nga caregiver sa Israel.
Gintawag sang grupo ang operasyon nga paglapas sa soberanya kag tawhanon nga kinamatarong.
Sa interview sang Bombo Radyo kay Former Kabataan Partylist Representative Raoul Manuel, iya ginpahayag nga kabahin sang estratehiya sang Estados Unidos sang America amo ang “hybrid warfare” batok sa mga pungsod nga nagapamalibad nga maimpluwensiyahan, lakip na ang paggamit sang economic sanctions, propaganda, kag tago nga operasyon.
Suno sa iya, indi lang ini isa ka kontra-terorismo kundi isa ka paagi agud mapadayon ang hegemonya sa rehiyon.
Samtang, ginpakamalaot man ni Manuel kag sang BAYAN Panay ang administrasyon ni Ferdinand Marcos Jr. sa paggamit sang Pilipinas bilang “staging ground” sa mga military operation sang Estados Unidos sa idalum sang Enhanced Defence Cooperation Agreement (EDCA), gani ginbutang sa katalagman ang pungsod kag nangin target sang mga pagtimalos nga pag-atake.
Nagapanawagan man si Manuel, upod sa BAYAN Panay, nga tapuson na ang EDCA kag iban pa nga mga military agreement, kag ipatuman ang independente kag malinong nga foreign policy sang Pilipinas nga nakabase sa soberanya, pagtahod sa international law, kag pag-amlig sa mga pumuluyo.
