Gin-ako sang tiglawas sang Interpol sa Pilipinas nga wala sang kaupod si Former President Rodrigo Duterte sang ginpapanaog na ini sa eroplano kag ginsakay sa stretcher sa The Hague, Netherlands.
Nagpahayag sang pagkabalaka si Senator Christopher “Bong” Go sa ginhiwat nga hearing sa Senado kun sa diin gintumod nga kasunod sang pagkapriso sa anay Pangulo na-isolate ini, wala gintugutan nga ma-access sang iya nga personal doctors, kag wala nahatag ang mga nagakadapat nga bulong para sa iya nga nabatyag.
Gin-ako ni Special Envoy on Transnational Crime Ambassador Markus Lacanilao nga nagaisahanon nalang si Duterte sang ginsugat sang mga tinawo sang International Criminal Court (ICC) pag-abot sa The Hague.
Wala suno diri sila gintugutan sang ICC nga updan pa ang anay Pangulo tubtob sa dal-on ini sa iya nga detention facility.
Sang mapamangkot naman ni Go kun paano ang access sa medication sang anay Pangulo kun wala na ini sang kaupod sa pagpanaog sa eroplano, ginsabat ni Lacanilao nga naghinyo kag ginpaathag na lamang sang personal nurse ni Duterte kag sang Philippine National Police (PNP) doctor ang mga kinahanglan sini nga bulong.
Dugang pa nga bisan sila wala man gintugutan nga mag-upod sa anay Pangulo. Ginpahayag ni Go nga 27 ka bilog ang bulong nga kinahanglan imnon adlaw-adlaw sang anay Pangulo kag nahibaluan suno diri nga tubtob subong wala sa gihapon ginpainom kay Duterte ang mga kinahanglanon nga bulong sini apisar duha ka beses na nga nagpadala sang mga bulong para sa iya.
