Nakuhaan sang ginapatihan iligal nga droga ang isa ka gabunan nga kawatan sa ginpatigayon nga drug buy-bust operation sa Sitio Iwahig, Barangay Banica, Roxas City.
Ginkilala ang nadakpan nga si Rodman ‘alyas Toto’ Sangrines, 20 anyos kag residente sang nasambit nga barangay.
Sa interview sang Bombo Radyo kay Punong Barangay Xander Agrasada, iya ginpahayag nga menor de edad pa lang ang nasambit nga persona kag may daan na nga record sa mga kinawatay sa barangay kag sa subong yara man ini sa listahan sang mga drug surenderee.
Suno pa kay Agrasada, nakuhaan sang anum tanan ka sachet sang ginapatihan shabu nga nagdangat sa 10 grams kag lakip na ang 7,000 nga buy-bust money.
Pahayag pa niya, nagapabilin sa subong sa kustodiya sang mga kapulisan sa Roxas Component City Police Station kag natalana nga pasakaan sang nagakaigo nga kaso.
Nagpanawagan man ini sa mga pumuluyo sang Barangay Banica nga makig-angot sa Barangay Council kun may yara sang insidente sang kinawatay kag may mga nagaduso sang iligal nga droga agud mahatagan sang tikang kag mapabilin ang kalinong sang lugar.
