Ginsuguran na sang Gilas Pilipinas ang matindi nga ensayo halos isa ka semana antes ang paghiwaton sang mga ini nga friendly games sa Doha, Qatar.
Suno kay Gilas coach Tim Cone nga ang pagpasakop nila sa Qatar ang kabahin na man sang paghanda para sa third window sang FIBA Asia Cup Qualifiers.
Una nga makaatubang nila ang Qatar kag Lebanon sa Pebrero 15 kag ang Egypt naman sa Pebrero 17.
Bangud sa sulod na sila sa FIBA Asia Cup 2025 sa bulan sang Agosto, pagagamiton nila ang nasambit nga hampang para mapapag-on pa ang ila grupo.
Ang friendly games sa Qatar ang kahigayunan nga masanay sanday AJ Edu kag Jamie Malonzo amo man para maka-adjust sila sa pagkadula ni Kai Sotto nga nagapaayo sa injury.
Gin-ako man ni Cone nga kun indi sila kwalipikado sa FIBA Asia Cup, indi man sila magpasakop sa friendly games sa Doha kag pagapokusan na lamang sang mga ini ang hampang nila kontra sa Chinese Taipei kag New Zealand.
Matandaan nga makaatubang man sang Gilas ang Chinese Taipei sa Pebrero 20 nga pagahiwaton sa Taiwan samtang ang New Zealand naman sa Pebrero 23.
