Nagapabilin sa gihapon nga palamangkutanon kun ano ang kamatuoran sa gin-post sang isa ka persona kun sa diin ginapahayag nga may naglagas kag naghana-labo sa iya samtang ginasubay ang dalanon sa Barangay Timpas, Panitan, Capiz.
Sa interview sang Bombo Radyo kay Punong Barangay Teody Degones sang Brgy. Timpas, ginpahayag nga indi pa nila matumod kun ano ang kamatuoran sa likod sang mga pahayag sang amo nga persona nga ginkilala kay alyas Eric.
Dugang pa sini, ang posible nga ginatumod man nga rason sa pagpanglagas kay alyas Eric, amo ang pagkabingit sang residente sa nasambit nga lugar, bangud ginapahayag nga open muffler ang motorsiklo nga ginamaneho sini.
Mahibaluan, base man sa pagpangusisa ni Kapitan kag sang iban pa nga mga opisyal sa lugar, ginpahayag nga wala man suno diri sang may nagama-oy ukon yara sa impluwensya sang makahulubog nga ilimnon nga posible mangin rason sang pagpanglagas kag pagpanglabo kay Eric kag dugang pa sini, wala man sang may nagpabalhag sa ila talatapan kag sa mga kapulisan natuhoy sa nasambit nga insidente.
Sa karon, ginahulat naman ni Kapitan Degones ang presensya ni alyas Eric sa ila talatapan para nga matumod na kun ano ang kamatuoran kag mahatagan sang nagakaigo nga aksyon.
