ROXAS CITY –Ginpanginwala sang pamunuan sang city accounting office sa Roxas City hall nga nagwaras ang anay city administrator sang nagpadulong sa talatapan para hikutaron ang mga papeles sa iya terminal fee kag iban nga benepisyo.
Ginpahayag ni Mrs. Tess Billones, department head sang city accounting office nga nagtaasay lamang sila sang tingog ni Tan matapos nagpamalibad ini nga pirmahan ang mga dokumento agud makuha sang anay administrador ang benepisyo sini nga nagalab-ot sa P800,000.
Nahibaluan nga ginpangita ni Billones ang titulo sang duta nga ginbakal sang gobyerno sang syudad sa administrasyon ni anay Mayor Alan Celino nga nagabalor sang P10milyones bangud tobtob sa karon wala pa ini ma-transfer sa city government
Suno kay Billones antes sini pirmahan ang mga clearances ni Tan, kinahanglan nga ma-settle sini ang tanan nga mga obligasyon sang ini ang nagpangalagad pa bilang city administrator.
Nauna diri nagkuha sang atensyon sang mga tawo sa city hall ang presensiya sang mga pulis nga nagpadulong sa city accounting office matapos nagpangayo sang police assistance ang pila ka empleyado sang gobyerno bangud sa ginaalegar pagwaras ni Tan sa sulod sang city accounting office.
