ROXAS CITY-Dismayado ang 25 anyos nga ginang matapos nga ginkakas ang pangalan sa listahan sang makabaton sang tag-P6,000 nga ayuda sa idalom sang Social Amelioration Program (SAP) sang Department of Social Welfare and Development (DSWD) sa Barangay Malocloc Sur, Ivisan, Capiz.
Ginpahayag sang tagreklamo nga si Roselyn Didulo Varcas nga nagkadto si Barangay Kagawad Melly Occeño kag ang isa ka Barangay Health Worker (BHW) sa ila balay agud ipaathag sa iya ang ila pagahimuon nga pagsulundan sa mga makabaton sang amo nga ayuda.
Suno kay Barcas nga ginpahayag sang kagawad nga buhinan sang P2, 000 ang mabaton sini nga ayuda kag ang nabuhin nga kantidad ang igahatag sa mga wala makabaton sang ayuda.
Gindugang pa sang ginang nga gintuad ni Kagawad Occeño nga sa tion nga indi magpasugot ang ginang, pagadulaon na lamang ini sa listahan.
Bangud sini gilayon nga nagkuha sang cellphone ang ginang kag ginkuhaan sang video ang mga pahayag sang nasambit nga kagawad.
Samtang nga wala nagpasugot ginang sa nasambit nga sistema, nakibot na gid lamang ini nga ginkakas na siya sa listahan sang mga makabaton sang ayuda.
Ginkompirmar naman ni Kagawad Occeño nga mando ni Punong Barangay Boy Villar ang pagbuhin sang P2, 000 sa mabaton sang mga benepisyaryo.
