ROXAS CITY – Nadakpan na ang isa ka persona nga ginapahayag nagapangkuha-kuha sang mga pinamaklan ilabi na ang mga ginabilin sa mga traysikol kag motorsiklo sa Teodoro Arcenas Trade Center (TATC).
Ini mismo ang gikumpirmar sang Auxiliary Guard sang merkado nga si Richie Besana sang mainterview sang Bombo Radyo.
Suno kay Besana, natigayon nga madakpan ang persona matapos madakpan sa akto sang bumalakal nga ginakuha na sini ang iya pinamaklan kag didto gilayon nagpangayo sang bulig.
Mahibaluan nga sang natabo ini nagapatigayon sila sang iya mga kaupod sang inspection sa meat section.
Ang amu nga insidente, indi lamang una nga bes nga natabo sa merkado bangud suno kay Besana madugay na nila ini nga ginatinguhaan nga madakpan apang madanlog kag kahibalo magpangita sang tyempo.
Dugang pa diri nga nagtinguha pa kuntani nga magpalagyo ang nadakpan apang napaslawan ini.
