ROXAS CITY – Ginkumpirmar sang tagpamaba sang 3rd Infantry Division Philippine Army nga tumandok sang Barangay Tacayan Tapaz, Capiz ang ginapatihan miyembro sang rebelde nga grupo nga napatay sa engkwentro sang tunga sang tropa sa Sitio Agdalusan, Barangay Jayobo, Lambunao, Iloilo sang tinalikdan nga Setyembre 19.
Ginkilala ang napatay kay Jemar Diaz, 21-anyos.
Sa interview sang Bombo Radyo kay Lt.Col. J-Jay Javines, tagpamaba sang 3ID Philippine Army, natigayon nga makumpirmar ang pagkakilanlan sang bangkay matapos nga positibo ini nga ginkilala sang iya tiya kaupod ang kapitan sang Barangay Tacayan.
Matandaan nga nagluntad ang engkwentro sa tunga sang 82nd Infantry Batallion Philippine Army kag rebelde nga grupo nga nagresulta sa kamatayon ni Private First Class Mars Echevarria kag pagkapilas ni Private First Class Joemarie Llesis.
Nasapwan naman ang bangkay ni Diaz ginabulubanta 700 metros ang kalayuon sa ginluntaran sang enkwentro nga nakaputos sa duyan.
Suno kay Javines, daku ang posibilidad nga ginbilin na lang si Diaz sang iya mga kaupdanan agud madasig nga makapalagyo sa tropa.
Sandig sa latest monitoring sang PA, ginabulubanta napilasan sa engkwentro ang 4 ukon 5 nga miyembro sang rebelde nga grupo kun sa diin ang 1 diri ang ginbawian sang kabuhi kag ginlubong sa wala pa matumod nga lugar.
Narecover sa lugar ang duha ka 5.56mm M16A1 rifles, duha ka cal .45 M1911 pistols, isa ka 5.56mm short magazine nga may 20 live ammunition, isa ka 7.62mm (AK) magazine; isa ka 5.56mm long magazine; kag duha ka (2) cal.45 magazine nga may seven rounds capacity.
Mahibaluan, nga sandig sa panaysayon sang tiya ni Diaz nag-upod sa hublag si Diaz sang Disyembre 2020 kag humalin diri wala na ini nakapauli sa Capiz.
Samtang, gina-verify pa sang Philippine Army ang impormasyon nga ginaalegar kaupod man ni Diaz sa nasambit nga engkwentro ang iya mga ginikanan kag utod.
