Nagpabilin nga nagahugpong ang gobyerno sang Venezuela sa pihak sang pagdakop sang Estados Unidos kay President Nicolas Maduro.
Suno sa mga opisyal sang gobyerno, si Maduro sa gihapon ang ginakilala nga presidente sang pungsod, bisan pa nga yara na ini sa kustodiya sa New York kag magapangatubang sang kaso may kaangtanan sa iligal nga droga. Gintawag sang gobyerno sang Venezuela nga “kidnapping” ang pagdakop sang US.
Temporaryo man nga pagadumalahan ni Vice President Delcy Rodriguez ang pungsod sa bendisyon sang mga korte kag militar, apang nagapanindugan ini nga nagapabilin nga presidente si Maduro.
Gnhingyo ni Interior Minister Diosdado Cabello ang publiko nga magpabilin nga kalmado kag indi magpadala sa ginaalegar pagpamahog, samtang padayon nga ginakontrol sang mga opisyal sang gobyerno ang Caracas.
Ginpanindugan sang gobyerno sang Venezuela nga ang matuod nga katuyuan sang US amo ang pagkontrol sang malapad nga reserba sang langis sang pungsod.
Bangud sa ginpatuman nga blockade sang US, nag-untat ang pag-eksport sang langis sang Venezuela kag napilitan ang state oil company nga PDVSA nga buhinan ang produksyon, nga labi nga nagpalala sang sitwasyon sang ekonomiya.
Samtang, nagtuga sang kahadlok sa mga pumuluyo ang nasambit nga sitwasyon, apisar nga nagapabilin nga bukas ang pila ka mga balaligyaan kag panaderya.
Ginalauman man nga istoryahan sang United Nations Security Council ang insidente, samtang ginpakamalaot sang Russia kag China ang lihok sang US kag nagpanawagan sang malinong nga solusyon sa krisis.
