Gov-elect Castro, prayoridad ang pagpakay-o sang mga provincial roads sa mga kabanwahan – BM Apolinario

ROXAS CITY – Prayoridad ni Governor-elect Fredenil Oto Castro nga kay-uhon ang mga provincial roads sa mga kabanwahan sa probinsya sang Capiz.

Ini ang ginkumpirmar ni Board Member Weldie Tambol Apolinario sang mainterview sang Bombo Radyo.

Suno kay Apolinario, indi lamang provincial roads ang pagatutukan sang bag-o nga administrasyon amu man ang priority projects nagikan sa mga kabarangayan.

Pahayag sini nga nagasugod na ang ila pag-imbentaryo sa mga lugar nga nagakinahanglan sang igtalupangod agud sa ti-on nga pagpungko sang bag-o nga gobyernador gilayon ini nga maaksyunan kag ma-alokaran sang nagakaigo nga pondo.

Nagabaton naman sila sang mga priority projects sang mga kabarangayan apisar iba ang political color nga ginsuportahan.
Pamatuod suno diri nga wala sang may ginapili nga pagabuligan ang bag-o nga gobernador.

Nagalaum ini, nga dako ang pagbag-o nga matabo sa probinsya sa pagpungko ni Castro sa kapitolyo kun sa din tuyo sini ang maayo nga pinamatasan kag pagdumala sa gobyerno kag madamo nga mga proyekto para sa probinsya.

Matandaan nga personal nga ginbisita ni incoming Governor Castro kag BM Apolinario ang mga kabanwahan sang Pilar, Panit-an kag Maayon nga tuman nga naapektuhan sang nanligad nga bagyo.

Natalana naman nga pagapadulungon sang mga ini ang banwa sang Panay kag Pontevedra.