Ginatudlo suspek ang isa ka government employee sa pagkuha sang salakyan nga nakaparada sa Calanza Apartment, San Jose Village, Barangay Tiza, Roxas City, Capiz.
Ginkilala ang nagpabalhag kay alyas “Andrea”, 22-anyos, college student, kag residente sang nasambit nga lugar samtang ang ginatudlo naman ang suspek ang ginkilala kay alyas “Mildred”, 45-anyos kag residente sang Barangay Adlawan, sining syudad.
Sa impormasyon nga nakuha sang Bombo Radyo nagikan sa Roxas City PNP, ginapahayag nga takna alas 5:00 sang hapon pag-abot sang biktima sa iya apartment nagikan sa eskwelahan, natalupangdan sini nga wala na ang Ford Ranger Pick-up nga salakyan nga may plate no. FAB 3723 sang iya amay nga nakaparada sa garahe.
Bangud sini, gilayon nga nagtawag ang biktima sa iya amay nga nagtrabaho bilang nurse sa California USA agud ipahibalo ang insidente.
Apang sang ulihi, nahibaluan na lamang sang biktima nga ang nasambit nga salakyan yara sa kustodiya sang iya tiya nga ginatudlo suspek.
