Naghinun-anon si Governor Fredenil H. Castro kaupod ang mga opisyal sang Philippine Drug Enforcement Agency (PDEA) nahanungod sa plano nga pagpangita sang angay nga lote ukon lugar para sa permanente nga provincial office sang ahensya sa Capiz.
Natabo ang pagtililipon sang Agosto 28, 2026 sa talatapan sang Gobernador sa Kapitolyo, kun sa diin ginhisugtan ang posibilidad sang paghatag sang lugar nga sarang mag-akomodar sang opisina sang PDEA kag makasuporta sa ila padayon nga operasyon kag serbisyo sa probinsya.
Suno kay Governor Castro, importante ang paghatag sang permanente kag husto nga lugar para sa PDEA agud mangin mas organisado, episyente kag epektibo ang pagpatuman sang ila mga programa kag responsibilidad batok sa iligal nga droga.
Kaupod sang Gobernador sa paghinun-anon sanday Deputy Director General for Operations (DDGO) Assistant Secretary Renato Gumban, Regional Director Ralph Rommel Torres, PDEA Capiz Provincial Officer Jury Rocamora, Assistant Provincial Officer Dennis Parreñas, kag Barangay Drug Clearing Officer Nemae Trinidad.
Gin-athag man sang Provincial Government of Capiz nga ang paghatag sang suporta sa PDEA kabahin sang padayon nga pagpakig-angut sang Provincial Government sa mga national government agencies para sa pagpalig-on sang kalinong, seguridad kag kaayuhan sang mga Capiznon.
Paagi sa paghatag sang angay nga lugar para sa PDEA, ginapaabot nga mas mapabakod pa ang koordinasyon kag operasyon sang ahensya sa pag-atubang sang problema sang iligal nga droga sa probinsya.
