Governor-elect Castro, nagpatigayon sang ocular inspection sa rmph; utang sang ospital sa kuryente posible magdangat sa P1.4M

ROXAS CITY – Nagpatigayon sang ocular inspection si Governor-elect Fredenil Oto Castro, Vice Governor-elect James Magbanua kag mga miyembro sang Sannguniang Panlalawigan sa Roxas Memorial Provincial Hospital (RMPH) agud mahibaluan ang kinahanglan nga iga-improbar kag mahatagan sang atensyon ang problema nga ginapangtubang sa ospital.

Sa interview sang Bombo Radyo kay Board Member Sonny Besa, ginpahayag sini nga, dismayado ang bug-os nga SP kag Castro bangud sa nasaksihan nga sitwasyon sang ospital.

Suno kay Besa, prayoridad sang bag-o nga administrasyon ang ikaayo sang ospital, indi lang sa probinsya amu man sa mga district hospitals.

Sa ila pagbisita, natukiban ang 5 ka mga guba nga dialysis machine kag madamo nga bulong ang nag-expired kun sa din masami ini nga isyu sang ospital.

Ginpahayag sini, nga plano ni Castro nga kay-uhon ang pagdumala sang ospital, maduganganan ang mga kinahanglan nga makinarya kag eexpand ang ICU facilities.

Suno kay Besa, maayo nga tikang ang ocular inspection agud mahatagan sang igtalupangod sang SP ang mga isyu kag gilayon nga maaksyunan.

Samtang, palaligban naman kay Besa ang posible nga pagdangat sa P1.4M nga utang sang ospital sa CAPELCO apisar padayon na ang pagnubo sang kaso sang COVID-19 sa probinsya.

Dugang pa sini, nga dako ang problema nga paga-atubangon sang bag-o nga administrasyon bangud sa ginhimo nga problema sang administrasyon ni Contreras.